இறுதி வரை திமுக

சிலரது தவறான ஆலோசனையால் கருணாநிதி தன் மீது நடவடிக்கை எடுத்திருப்பதாக மத்திய அமைச்சர் பதவியை ராஜினாமா செய்துள்ள தயாநிதி மாறன் கூறியுள்ளார்.
சென்னையில் தனது இல்லத்தில் செய்தியாளர்களுக்கு பேட்டி அளித்த அவர், திமுகவுக்கு களங்கம் ஏற்படுத்தும் எந்த நடவடிக்கையிலும் தாம் ஈடுபடவில்லை என்றும் தெரிவித்துள்ளார்.
தனக்கு எதிராக கருணாநிதிக்கு தவறான ஆலோசனை கூறியது யார் என்பதை தெரிவிக்க மறுத்துவிட்ட தயாநிதி மாறன், கருணாநிதிக்கு தன் மீது ஏற்ட்ட சந்தேகம் தம்மை மிகவும் பாதித்ததாக கூறினார்.
மந்திரி பதவி பற்றி தாம் கவலைப்படவில்லை என்றும், தாம் கட்சி விரோத நடவடிக்கைகளில் ஈடுபட்டதாக கூறப்படும் குற்றச்சாட்டு தம்மை வருத்தமடையச் செய்திருப்பதாகவும் அவர் தெரிவித்தார்.
திமுக தொண்டராக பிறந்த தாம் திமுக தொண்டராகவே இறக்கவும் விரும்புவதாக கூறிய தயாநிதி மாறன், கட்சியில் இருந்து தாம் நீக்கப்பட்டாலும், தொடர்ந்து கட்சியின் ஆதரவாளராக இருக்கப் போவதாகவும் கூறினார்.
பதவி விலகல் தொடர்பாக பிரதமர் மன்மோகன் சிங் மற்றும் காங்கிரஸ் தலைவர் சோனியா காந்தியுடன் தாம் பேசியதாகவும், இந்த முடிவு குறிதது அவர்கள் அதிரச்சி அடைந்திருப்பதாகவும் தெரிவித்தார்.